Мэдээллийн эрин зуун хөгжсөн глобалчлагдсан XXI-р зуунд аялал жуулчлал нь өндөр байр суурь эзэлдэг ба тухайн улс орны эдийн засгийн хөгжлийн гол чиг хандлагыг тодорхойлогч салбар гэж хэлж болно. Аялал жуулчлал ийнхүү хурдацтай хөгжсөний гол шалтгаан нь хүмүүсийн амьдралын түвшин сайжирч санаа зовох зүйлгүй болж байгаа нь тэдний сонирхол өөр зүйлд шилжиж байгаатай холбож үзэж болох юм.
Аялал жуулчлал хөгжсөнөөр тухайн улсын эдийн засаг, нийгэм, соёлын харилцаа, дэд бүтэц, нутгийн иргэдийн амьжиргааг дээшлүүлэх, ажлын байрыг ихээр бий болгох хүмүүсийг амралт чөлөөт цагаа зугаатай өнгөрөөж, өөрийн болон бусад орны түүх соёл, ёс заншил, шашин шүтлэг, ан амьтан, ургамал, байгалийн сайхныг үзэж сонирхох гэх мэт маш олон эерэг давуу тал бий. Гэвч аливаа юм эерэг болон сөрөг талтай байдаг. Тухайн орныг жуулчид маш их сонирхож ирлээ гээд ирсэн бүх жуулчдыг хүлээж авна гэсэн үг биш юм. Учир нь үзмэрүүд нь дахин сэргэгдэх ба сэргэгдэхгүй гэж ангилагдана. Сэргээгдэх нөөц нь маш удаан хугацааны дараа сэргээгддэг. Жишээ нь: Хүн, мал их явсан хөрс нь дор хаяж арван жилийн дараа сэргээгддэг гэдэг.
Жуулчид болон хүн ихээр сууршисан газрын байгаль орчин бохирдох, ан амьтан үргэж мөн устаж үгүй болох, тухайн газар нутгийн даац хэтрэх, хөрсний элэгдэл, агаарын бохирдол зэрэг экологийн тэнцвэрт байдал алдагдаж байна . Аялал жуулчлалын салбартай холбож авч үзвэл: Өмнөговь аймгийн Гурван сайхан ууланд байрлах Ёлын ам нь өвөл ч зун ч байнгын мөстэй байдаг байсан бол одоо жуулчид ихээр очсоноор мөс нь жилээс жилд хайлж үзэсгэлэнт байдлаа алдаж байгаа нь нутгийн даац хэтэрсэний нэг илрэл юм.
Иймд бид аялал жуулчлалаа тогтвортойгоор хөгжүүлж байгаль орчноо байгалийн хүчин зүйлээс хамгаалж чаддаггүй юмаа гэхэд хүний гараар хийдэг буруутай үйл ажиллагаагаа таслан зогсоож манай орныг зорин ирэх жуулчдын тоог бууруулах бус нэмэгдүүлэх нь хариуцлагатай аялал жуулчлал гэж бодож байна. Манай оронд хариуцлагатай аялал жуулчлалыг олон талаар хэрэгжүүлж эхэлж байгаа. Үүний нэг илрэл нь “Эко аялал “ буюу байгальд ээлтэй аялал жуулчлал юм.
Дэлхийн байгаль хамгаалах холбооноос Эко аялалыг харьцангуй онгон байгальд байгалийн сайхан, нутгийн хүн ардын ахуйн соёлтой танилцаж, тэдний соёл, зан заншил, түүхийг танин мэдэх зорилгоор тэдний нийгэм, эдийн засгийн байдал, байгаль хамгаалах үйл ажиллагаанд хувь нэмэр оруулах гэсэн байдаг. Манай орны хувьд аялал жуулчлал нь ихэвчлэн байгаль дээр түшиглэж явагддаг.
Бид Эко аялал жуулчлалыг хөгжүүлэхийн тулд:
1. Нутгийн иргэдэд тухайн газар нутгийг хайрлаж , хамгаалах үүргийг хүлээлгэж, эргээд хариуцлага хүлээлгэх эзэнтэй болгох;
2. Жуулчид болон ард иргэдийг байгаль орчинтойгоо ухамсартайгаар зөв харьцаж сургах, олон нийтийн ажлуудыг зохион байгуулах;
3. ТХГН болон бусад зүйлсээс авсан хураамжаараа хуримтлал үүсгэн түүгээрээ байгаль хамгаалах ажилд зарцуулах;
4. Байгаль хамгаалахаар сайн дураар нэгдсэн нутгийн иргэд, нөхөрлөлийг төр засгаас дэмжин тодорхой хэмжээний цалин, хөлс олгох гэх мэт ажлуудыг хийснээр хариуцлагатай аялал жуулчлалыг жинхэнэ утгаар нь Монгол орны хөрсөн дээр бодитоор буулгана гэж бодож байна.
Монгол оронд аялал жуулчлалын чиглэлээр үйл ажиллагаа явуулдаг тур оператор компаниудын үндсэн аялалын чиглэл нь УБ-Архангай-Өвөрхангай-Хөвсгөл, УБ-Говь гэсэн Монголдоо алдартай байгалийн үзэсгэлэнт цөөхөн газруудаар аялах үндсэн хэдхэн маршрутаар явагдаж байгаа нь дээрх бичсэн зүйлсийн гол шалтгаан болж байна гэж хэлж болно.
Жуулчдын очиж байгаагүй мэдэхгүй хүний сонирхол татахуйц зүйлсийг нийтэд сурталчилж түүнийхээ дагуу аялал зохиовол нэг тийшээ хошуурах жуулчдын хөл татран олон тийш болно.Ингэснээр экологийн тэнцвэрт байдал алдагдахгүй, түүнийг дагасан хор уршиг бага байна. Олон маршрутаар жуулчдыг явуулсанаар бүх талын эерэг нөлөөлөл бий болно.
Дэлхийн улс орнууд анх аялал жуулчлалыг хөгжүүлэхдээ амралт цэнгээний, далайн эргийн аялал зохиодог байсан бол одоо үед тогтвортой, хариуцлагатай аялал жуулчлалыг баримталж ажиллаж байна. Техник технилоги өндөр хөгжсөн орнуудын хувьд энэ нь бэрхшээлтэй байж болох талтай. Тогтвортой аялал жуулчлал гэдэг нь өнөөдрийн үзүүлсэн үзмэр зүйлсийг хэдэн жилийн дараа яг тэр чигээр нь байгаагаар нь хүмүүст хүргэхийг хэлдэг.
Харин манай орон нь байгалийн онгон төрх, цэлмэг хөх тэнгэр, ан амьтан ургамал, нүүдэлчдийн ёс заншил, амьдралын зан үйл, түүхээрээ жуулчдыг татдаг бол одоо үзмэрүүдийн чанар жилээс жилд алдагдаж байгаль маань онгон байдлаа алдаж, нүүдэлчин монголчууд маань суурин амьдралруу хошуурч байна.
Хойч үедээ дараагийн ирэх жуулчиддаа бид юу үзүүлэх вэ? гэсэн асуулт бидний өмнө зайлшгүй гарч ирнэ. Тэр үед л бидний толгойд хариуцлагатай, тогтвортой гэдэг үг ямар их үнэ цэнэтэйг санагдах вий гэж санаа зовох боллоо. Ийм учраас хариуцлагатай аялал жуулчлалыг нэн тэргүүнд хөгжүүлэх шаардлагатай. Аялал жуулчлалын салбарт ажиллаж буй боловсон хүчингүүд ч бас зөвхөн ашгийн төлөө бус бид энэ сайхан монгол орны өнгө төрхийг гадаадад таниулж байгаа гэдгээ ямагт санаж байгальдаа ээлтэй, хариуцлагатай харилцан уялдаатай байх хэрэгтэй гэж бодож байна. Хариуцлагатай аялал жуулчлалыг хөгжүүлэхийн тулд уул уурхайн салбартай хамтран харилцан уялдаатай ажиллаж байж бодит үр дүнд хүрнэ.
Хариуцлагатай аялал жуулчлал монгол оронд 100% хөгжих боломжтой ба цаашид “Монгол орны имиж” болгож болно гэж үзэж байна. Ирээдүйн аялал жуулчлалын мэргэжлээр сурч буй оюутан бидний хувьд ч мэргэжил маань хэзээд эрэлттэй байж ирээдүйн ажил амьдралын баталгаа бий болно гэсэн үг юм.